Guru Parampara

ભગવાનના સ્વરૂપમાં અખંડ વૃત્તિ રાખનાર, સર્વોપરી ઉપાસનાના પ્રખર પ્રવર્તક અને સત્સંગ સંવર્ધન માટે જીવન સમર્પિત કરનાર અક્ષરધામના મૂર્તિમાન સ્વરૂપ. સરળતા, સેવા, સમર્પણ અને ત્યાગ-વૈરાગ્યની મૂર્તિ એવા ગુણાતીતાનંદ સ્વામીએ અસંખ્ય જીવોમાં શ્રીહરિની સર્વોપરી નિષ્ઠા દૃઢ કરી.

સદ્. શ્રી બાલમુકુન્દદાસજી સ્વામીના શિષ્યત્વને સ્વીકારી સાધુતાના ગુણોથી શોભતા, રમુજી દૃષ્ટાંતો દ્વારા શ્રીહરિના સિદ્ધાંતો અને મહિમાને સરળતાથી સમજાવનાર સંત. જેતપુર મંદિરમાં નિષ્ઠાપૂર્વક સેવા કરનાર અને પોતાના સેવાભાવી શિષ્ય હરિજીવનદાસજીને કાયમ માટે જેતપુર મંદિરની સેવામાં સમર્પિત કરનાર દયાળુ અને નિઃસ્પૃહી સંત.

સદ્ગુરુ શ્રી હરિજીવનદાસજી સ્વામીનું શિષ્યત્વ સ્વીકારી, દસ વર્ષ સુધી જેતપુર ગાદીસ્થાનમાં ગુરુની અનુવૃત્તિમાં રહી ગુરુઆજ્ઞા અને સેવાને જીવનનું મુખ્ય અંગ બનાવનાર સંત. જેતપુર ગાદીસ્થાનના મહોત્સવો તથા વિકાસકાર્યોમાં મહત્વપૂર્ણ સેવા આપી, ત્યારબાદ સુરત પધારી શ્રી સ્વામિનારાયણ મંદિર કલાકુંજ અને શ્રી સ્વામિનારાયણ મિશન (ગુરુકુળ)ની સ્થાપના કરી. દક્ષિણ ગુજરાતમાં ભીખાભાઈ ભગતજી પરિવાર દ્વારા સ્થાપિત મંદિરો તથા સત્સંગના વિકાસને નવી ગતિ અને વ્યાપ આપ્યો.

વડતાલ ધામના મુખ્ય કોઠારી તરીકે સૂઝબૂઝ અને કાર્યદક્ષતાથી સેવા આપી ધામના વિકાસમાં મહત્વપૂર્ણ યોગદાન આપ્યું. ત્યારબાદ જેતપુર ગાદીસ્થાનનું મહંત પદ સ્વીકારી અનેક ઐતિહાસિક ઉત્સવો તથા યાત્રાળુઓની સુવિધા માટેના મહત્વપૂર્ણ વિકાસકાર્યોને સાકાર કર્યા.

ભક્તચિંતામણિ કથા દ્વારા શ્રીહરિના દિવ્ય ચરિત્રો, સર્વોપરી મહિમા અને ઉપાસનાને જનજન સુધી પહોંચાડી, અસંખ્ય સત્સંગીઓમાં આધ્યાત્મિક બળ, અડગ નિષ્ઠા અને સત્સંગની પ્રેરણા જગાવી રહ્યા છે. આજે શ્રી સ્વામિનારાયણ મિશન–સુરત, શ્રી સ્વામિનારાયણ મંદિર કલાકુંજ–સુરત, શ્રીજી ગાદીસ્થાન–જેતપુર અને શ્રી સ્વામિનારાયણ મહામંત્રધામ–ફરેણી ખાતે મહંત પદે રહી સત્સંગ, સેવા અને આધ્યાત્મિક જાગૃતિનું કાર્ય અવિરતપણે આગળ ધપાવી રહ્યા છે.